Սիրելի՚ դպրոցականներ, ուսանողներ, մանկավարժներ, կրթության բնագավառի ներկայացուցիչներ, շնորհավորում եմ Ձեզ սեպտեմբերի մեկի` նոր ուսումնական տարվա մեկնարկի և Գիտելիքի օրվա կապակցությամբ: Այս օրը հիշարժան է բոլոր աշակերտների, մանավանդ առաջին դասարանցիների համար, ովքեր իրենց ուսուցիչների ուղեկցությամբ առաջին անգամ կմտնեն դպրոց` զարմանահրաշ մի աշխարհ, որը տարիների ընթացքում կդառնա նրանց համար անչափ հոգեհարազատ, սիրելի ու անմոռանալի մի վայր, որն ամբողջ կյանքում կոչելու են <<իմ դպրոցը>>: 
Սիրելի՛ բարեկամներ, Հայաստանի դպրոցների սաներին միայն բարին մաղթենք: Թող կրթության տարիները նրանց համար լինեն բեղմնավոր, բովանդակալից, հաջողակ, բերկրանքով լի և երբեք չմոռացվեն:

Հարգելի՛ համաքաղաքացիներ, 
Տեղեկացնում ենք , որ Ծաղկաձորի համայնքապետարանը սուբվենցիոն ծրագրով պատրաստվում է իրականացնել Ծաղկաձորի մանկապարտեզի բակային տարածքի վերանորոգման, արվեստի դպրոցի նոր մասնաշենքի կառուցման և փողոցների կապիտալ ասֆալտապատման աշխատանքներ:
Մրցույթներն արդեն հայտարարված են, և շուտով աշխատանքները կմեկնարկեն:

Հարգելի քաղաքացիներ

ՀՀ ոստիկանության զորքերում  առկա են  շարքային պայմանագրային զինծառայողների թափուր հաստիքներ:

Ծառայության պայմաններին մանրամասն ծանոթանալու  համար ցանկացողները կարող են դիմել ՀՀ ոստիկանության զորքերի կադրերի բաժին:

Հասցե՝ ք. Երևան,Դավթաշեն 2-րդ թաղամաս, 62/26,հեռախոս՝ 010-37-03-28:

Սկսվում է Համահայկական 7-րդ ամառային խաղերը

 Այս տարի կնշվի խաղերի 20-ամյակը: Բացման հանդիսավոր արարողությունը և մրցութային 3 օրերը կանցկացվեն Ստեփանակերտում:

Այս խաղերը տարբերվելու են մյուսներից՝ լինելով լավագույնը, խորհրդանշելով ՀՀ-Արցախ-Սփյուռք հզոր եռամիասնությունը:

Այս խաղերում չեն լինելու պարտվողներ՝  հաղթելու է մեր ողջ ժողովուրդը, հաղթելու է  միասնականությունը,  կամքն ու վճռականությունը: 

Ծաղկաձոր համայնքի ղեկավար Արթուր Հարությունյանի պատրաստակամությամբ և աջակցությամբ՝ Ծաղկաձորի մանկական արվեստի դպրոցի պարային համույթի սաները՝ Արփինե Պողոսյանի ղեկավարությամբ, այս տարի ևս մասնակցեցին <<Մինորա>>մշակութային կենտրոնի միջնորդությամբ Վրաստանի Քոբուլեթի քաղաքում կայացած <<Оранжевое Кобулети-2019>> միջազգային փառատոնին՝ զբաղեցնելով պատվավոր առաջին հորիզոնականը:

Կենսագործունեության միջավայրի ծրագրվող փոփոխությունների մասին իրազեկումը  և հրապարակված քաղաքաշինական ծրագրերի ու նախագծերի քննարկմանը և որոշումների ընդունմանը հասարակության ներկայացուցիչների մասնակցությունն ապահովելու նպատակով  Ծաղկաձորի համայնքապետարանում 2019 թվականի հուլիսի 26-ին, ժամը 11:00-ին անցկացվելու է հանրային քննարկում՝ ՀՀ Կոտայքի մարզ, ք.Ծաղկաձոր, Անտառային 1-ին թաղամաս, թիվ 10 և 10/1 հասցեներում բազմաֆունկցիոնալ  համալիրի կառուցման վերաբերյալ:

    Նախագծային փաստաթղթերին Ծաղկաձոր համայնքի բնակիչները և շահագրգիռ կազմակերպությունները կարող են ծանոթանալ Ծաղկաձորի համայնքապետարանի քաղաքաշինության բաժնում:

Հայաստանի ազգային պարալիմպիկ կոմիտեն (ՀԱՊԿ) հունիսի 11-13-ը Ծաղկաձորի գլխավոր մարզահամալիրում կազմակերպել էր հաշմանդամություն ունեցող անձանց հանրապետական 17-րդ մարզական փառատոնը:

Փառատոնին մասնակցեցին հաշմանդամություն ունեցող անձինք` հանրապետության տարբեր մարզերից, ովքեր չափեցին իրենց ուժերը անվասայլակներով բասկետբոլ, սեղանի թենիս, ծանրամարտ, բազկամարտ, շախմատ, լող մարզաձևերում:

Միջոցառման բացման արարողությունը տեղի ունեցավ հունիսի 11-ին, փակման արարողությունը և մրցանակաբաշխությունը` հունիսի 13-ին:
Մրցանակաբաշխությանը ներկա էին նաև Ծաղկաձորի համայնքապետ Արթուր Հարությունյանը և ՀՀ կրթության, գիտության մշակույթի և սպորտի նախարարի տեղակալ Գևորգ Լոռեցյանը: